معلومة عند الدهانات

 

الدهانات يعتبر من اهم البنود في التشطيب لانه بيدي جمال وروح للشقه

مبدأيا الدهانات هي آخر لمسة بتحطها في لوحتك الفنية (شقتك) اما ان اللمسة دي تبوظلك اللوحة كلها او تطلعلك لوحة فنية جميلة متناغمة ومتجانسة تبهرك

- الفرق بين الدهانات البلاستيك ودهانات الزيت:

حابين في الاول نوضح الفرق بين الدهانات البلاستيك والزيت لان في ناس كتير بتسمع المصطلحات دي ومبتكونش عارفه ايه الفرق.

1- دهانات الزيت : دي دهانات اساسها زيتي ، ودي دهانات قابله للغسيل عادي ، عشان كدا زمان كانوا بيستعملوها بكثره. لكن قل استخدامها في الوقت الحالي

2- دهانات البلاستيك : دي دهانات بيكون أساسها مائي ودي علي نوعين ..

-نوع غير قابل للغسيل :غير مستحب والناس مبتتجهش له .

-النوع الثاني هو النوع القابل للغسيل : ودا نوع مطور من النوع الأول ودا اللي بقي اكثر رواجاً واستخداماً واللي الناس اتجهت له خلاص وبقت بتستعمله

- التجهيز لبند الدهانات:

- بعد ما خلصنا سباكه وكهربا ؟

هنجيب حد يشتغل في " مرمات المحاره " والمرمات دي اماكن التكسير في المحاره مكان السباك والكهربائي ..

فحضرتك بتجيب مبيض محاره كويس وبتجيبله: أسمنت ورمل وبتوفرله:

- المياه

- جركن من مادة " اديبوند " ودة بيعلي خواص المونه اللى بيشتغل بيها المبيض بحيث انها تمسك في المحاره القديمة كويس وبتجيب الجركن ده من اي شركة زي #سيكا او #كيماويات_البناء_الحديث CMP. -سلك شبك : ودة بيتحط على وش اي مجموعة خراطيم بحيث المكان دة بيكون عرضه ان المحاره فيه تفصل بعد كدة وتشرخ .. فاحنا بنحطه ف الاماكن دي عشان متفصلش وتتسبب لينا مشاكل بعد كدا احنا في غني عنها.

- ماركات الدهانات البلاستيكية:

عندي ماركات كتير طبعا في السوق ولكن الماركات المضمونه والمستعمله بكثره هي ( جوتن - جي ال سي - سكيب - سايبس - الجزيره ).

فكل اللي عليك انك بتشتري معجون جاهز وبويه ، المعجون ده بنسميه معجون التاسيس ، والبويه بلاستيك بتتباع جوه #بستله او #جازله .. البستله بيكون مقاسها كبير ، والجازله بيكون مقاسها صغير.

- وانا رايح اشتري لازم اخد بالي من شوية حاجات:

1- درجة اللون: ودي طبعا بتختارها من الكارتله وبتكون دهانات كمبيوتر يعني بتختار الدرجة اللي انت عاوزها بالظبط الدرجه هتطلع هيا اللي اختارتها مش حاجه قريبه منها.

2- درجة اللمعان: فيه عندي 3 درجات ..#مط ودا تحس ان الدهان مطفي كدا ومش حلو بصراحه ، #لامع ودا تحس ان الدهان بيبرق اوي ومش حلو برضو ، #نص_لمعه وده حاجه وسط بين الاتنين اللي فاتوا وده احلي واشيك.

3- القابلية للغسيل : هتلاقيه بيقولك في حاجات قابله للغسيل وفيه حاجات غير قابله للغسيل ، الاحسن طبعا زي ما قولنا القابل للغسيل.

- ازاي ابدأ في تنفيذ بند الدهانات:

عندنا التنفيذ بيمر بشوية مراحل بسيطه اوي:

1- تنضيف الحوائط : يعني بنضف الحوائط من الاتربه وبواقي الجبس ، اما : -بسنفره. -او حجر جلخ. -او سكينة معجون.

2- وش سِلر : بندي للحيطه وش من مادة السلر عشان تقفلي المسام بتاعت الحيطه.

3- مرحلة التأسيس : ويقصد بها مرحلة #المعجون ، طيب ليه انا بحط المعجون اصلا ما ممكن ادهن علي المحاره واخلص نفسي ؟ انا مش عايز ملمس المحاره الخشن انا عايز لما اجي احط ايدي علي الحيطه تديني ملمس ناعم ، المعتاد اننا مينفعش نعمل اقل من 2 سكينه معجون ، لو المحاره #مخدومه يكفي سكنتين ، انما لو المحاره تعبانه فهنحط من 3-4 سكاكين ، وبعد كدا #اسنفر الحيطه عشان انعمها ، ودي اول مرحلة استلام بتأكد فيها ان مفيش دبابيس في الحيطه ( حته كدا بتكون زي راس الدبوس ).

4- التلقيط ( مرحلة تابعة للمعجون ): ودي بنلجأ ليها لو في اماكن معينه فيها #ريجه فبجيب المعجون وبلقط الحته اللي فيها عيوب.

5- مرحلة التشطيب النهائي (او ال finish): ودي بعملها علي مرحلتين:

- #بطانة_الدهانات : بتكون وش مخفف من البويه اللي انا هدهن بيها عشان اكتم المعجون.

- #النهايات : بتكون بوية شحمه وادهنها اما 2 وش او 3.

- شويه نصائح كدا:

1- اتاكد قبل الدهان انك مغطي كل مخارج الكهرباء والحلق بتاع الباب والاكره والوزره السيراميك والارضيه كمان

2- اتاكد ان النقاش عمل عدد سكاكين المعجون اللي انتوا متفيقين عليها 2 او 3 وخليه يعمل كل سكينه بلون واحد مثلا ابيض والتاني بيج مثلا بحيث وانت طالع تشوف تعرف هو عمل كام سكينه معجون.

3- النقاش لازم ينتهي من دهانات السقف قبل دهانات الحيطه.

4- لو عايز اعمل شوية ديكورات في الدهانات ( رسومات) بنعمله علي ورق اسمه #استنسل وبيكون مرسوم عليه الرسمه اللي انا عاوزها.

5-فيه موجود في السوق ورق حائط 3D وبيكون شكله تحفه، بس لو هتعمل ورق حائط هتعمله بس علي الحيطه الرئيسية او عمود مثلا.

وهنزل منه البومات هنا

#دارك مش بس هتشطب شقتك لا انت هتتعامل مع فريق هندسي بيراعي كل التفاصيل الصغيرة دي عشان توصل لأقصى درجات الراحة في بيتك

#دارك